Testu n"asturiano A tocar nel Masaveu

De cutio nun anuncio los... "conciertos" que voi dar, pero bueno, habrá que apuntalo. El miércoles que vien hai una "clase de combo" de Marco Martínez nel Masaveu 55.

Nun ye un conciertu, porque (polo menos pola parte que me toca) nun semos músicos profesionales (dalgunu hai, por embargu).

Nin siquiera ye una "audición d'alumnos", porque nun ye un conciertucu.

Ye una clase. El profesor axúntanos pa que toquemos xunto con otra xente (en clas nunca nun tocamos con baxista ni baterista, por exemplu). Les coses puen salir mal (como siempres) y encima pue que Marco dea esplicaciones de lo que ficimos mal, o cómo hai que facer daqué.

Pero lo bueno ye que de toes maneres hai música, meyor o peor fecha, y que la entrada ye llibre. Así que si daquién tien curiosidá pue dir tranquilamente al Masaveu el miércoles 30 d'abril, a les ocho, tomar un kas (o lo que quiera) y ver a unos pininos tocando y, nel meyor de los casos, deprendiendo. Bueno, dalgunu de los que toca nun ye un pinin, ye una máquina.

Yo, sin nun se tuerce nada d'equí allá, voi tocar colos mis collacios Triste y Bye Bye Blackbird. Na primera tenemos más o menos preparao lo que va tocar caún (el exerciciu yera preparar el solo y escribilu), pero'n Bye Bye Blackbird se supón que caún va improvisar el su solu. Yo, además, voi acompañar a Ulises (ún de los más máquinas) que va tocar... Ornithology. Un canciu muncho, muncho más rápidu de lo que yo toi avezáu... Nun sé cómo me atrevo, pero estes coses nun hai que pensales. Probe Ulises...

Se fadrá lo que se pueda. Pero animáivos, que tamién, nun dexa de ser una clase del gran Marco Martínez gratis.