Testu n"asturiano De Trillo a Barrio Sésamo pasando per El Cristo

Los ecoloxistas son esa xente rara que ponse siempres en lo peor y ve desastres perdayures.

Lo malo ye que acierten siempres.

Alcuérdome de Aznalcóllar. Al entamar el asuntu, los políticos falen de que nun pasa ná, y los ecoloxistas de que pasa muncho. Meses desmpués, los científicos estudien el casu, y lo que dicen, ¿qué se paez mas, a lo que dicen los ecoloxistas o a lo que dicen los políticos?

Pues otra vegada. Dícenos que la enerxía nuclear ye segura, ecolóxica, la única solución pal efeutu invernaderu. Pero resulta que con tolos trebeyos que tienen nes centrales pa medir temperatures y radiaciones, que de xuru que funcionen perbién, tienen que ser los ecoloxistas, dende fora, los que digan: "Señores, que tienen ustedes un escape". Y entós dicen los de la central que home, que sí, que dalgún escapín hai, pero que nun ye ná. Los ecoloxistas dicen que home, que un pocoñín más que "ná" sí que ye. Y entós aporta el Conceyu de Seguridá Nuclear, y toma cartes nel asuntu, y dempúes de estudialo diz que los de la central escondieron coses, ocultaron información (qué raro pa una nuclear... Nunca nun pasara cosa tala) y sube el nivel del incidente de 1 a 2 na escala INES. Eso quier decir que'n España lo que pasó'n Ascó ye ún de los tres accidentes más graves dende'l añu 1990. Que nun ye un accidente mui grave, pué ser; namás que ye de nivel 2 nuna escala de 7. Pero tien su importancia, y los de la central decíen que yera nivel 1 (hebo 42 de estos dende'l añu 1990) y los del CSN dicen que no, que va ser nivel 2. Pero qué alarmistas, estos ecoloxistas.

Un de los (agora) tre sucesos de nivel 2 que hebo'n España dende el 1990 foi en Trillo, onde vive la familia del actor Juan Ramón Sánchez, el Chema de Barrio Sésamo, que ta acabante de morrer. A mí pillóme mayorucu lo de Espinete, pero d'aquella namás que hebía una cadena de televisión (bueno, dos) unes cuantes hores al día, asina que víemos toos lo mesmo, anque nun tuviéramos mirando pa ello. Y siempres tuve munchu apreciu por aquel grupu d'actores, que facíen coses de guante blancu pa los neños. Siéntolo nel alma por Juan Ramón, y pola so muyer Chelo Vivares (la que facía d'Espinete, y eso sí que ye un currículum, y dígolo en serio). Son xente a la que respeto muncho, muncho. Esos "titiriteros" que dalgún políticu cree que fai de menos llamándolos asina, cuandu son xente mui, mui grande.

Y una curiosidá. Güey son les eleiciones a rector, y ¿ónde me toca votar?. Yo doi clase nel campus de Los Catalanes. Tengo'l despachu (y di clases tamién) nel campus de Llamaquique. Vivo (anque esto nun tien por qué tenelo'n cuenta la Universidá) pegao al campus d'El Milán. Pues non: nengún de los tres. Mándenme a votar a El Cristo. Equí va un mapa con la lóxica del asuntu, anque nesti mapa lo que nun se ve ye la cuesta que hai pa aportar al campus, que fai que la distancia seya como'l doble. Ye verdá que hebo un períodu de reclamaciones y que nun lu emplegué, pero nun creyí que me tocara nel Cristo... Anque he reconocer que cuando lo miré ayeri creyí que diben mandame pa Xixón, que nun diba ser raro. Asina que nun voi quexame.