Orquesta Barroca de la Unión Europea

Ayeri foi a un conciertu de la EUBO nel Teatru Filarmónica. Foi ensin pensalo, porque llegóme una invitación por un amigu que tenía una de más (anque nun me la coyeron al entrar, y pémeque la entrada yera llibre). Y la música barroca gústame abondo.

La verdá que prestóme pola vida. Yeren como venti músicos, buenísimos. Hebía como una decena de vigulinos y violes, dos cellos, un contrabaxu, dos fagots, un oboe, y dos clavecinos (hebía un clavecinista y el direutor de la orquesta, Lars Ulrik Mortensen, tamién tocaba'l clavecín).

Prestaba ver cómo se metíen nel papel los músicos, y penrriba toos el direutor, que espresaba tol ratu col cuerpu, cola cara, tolo que-y suxería la música. La violinista solista, Lidewij van der Voort, que sal na semeya d'enrriba, tocaba con una enerxía y unes ganes que dexaben columbrar a una profesional, con seguridá, con sentimientu.

Tocaron una primera parte con obres de Fux, Roman y Rameau. Dempués del descansu, too Bach: el conciertu pa vigulín en la menor, BWV 1041 (hai que ver cómo se lució Lidewij), y la suite orquestal en do mayor, BWV 1066, que tamién me gusta porque téngola en discu y escúchola de xemes en cuandu. Pamidea que yera el mismu conciertu que dieron en agostu'n Hungría.

Sé que el Madrid va ser primeru al acabar el añu (mira qué noticia, una que malapenes pasó tovía), pero de que veníen músicos tan buenos a tocar gratis a Uviéu enteréme de casualidá. El fúbol ye cultura, dicen, y polo visto más importante que un conciertu barrocu, cómo non.