C.S.I.

Veo CSI delles veces. Hai críticos de televisión que falen d'ella como d'una gran serie. Siempres ye cosa de caún qué ye bueno o malo nuna serie, pero voy decir por qué me paez que anque tea fecha con munches perres nun tá tan cuidada como dicen.

- Por cómo los de la policía científica faen de todo. Detienen a xente, faen de abogáos, tiren de pistola, entren nes cases delantre los policías d'uniforme, persiguen... Nun me lo creo. Nun ye asina.

- Por cómo los personaxes se despliquen unos a otros lo que faen y lo que nun faen. Ye pa tontos. Ya se sabe que ye pa que lo pescanciemos los espectaores, pero... queda de lo más falso y pedante. Imaxínome a un entibaor diciéndo-y a otru: "Pera, Xuan, agora voy preparar la trabanca con esti hachu, que ye esti fierru afiláu que tengo equí". En CSI contestaríen-y: "Ah, claro, Nel, y la trabanca vas ponela nel techu pa que nun mos caiga enrriba, ¿nun ye eso?" Na realidá sería: "Oye, Nel, ta rifándose una hostia, y tienes toles papeletes. Vete a reíte de tu madre."

- Por cómo la informática fai coses que cenciellamente nun se puén facer. Cuandu ún ta viendo una semeya d'un coche coyíu dende diez kilómetros y quier ver el númberu bastidor y diz-y al téunicu: "¿Pues amplialo, ho?" Y el téunicu diz que sí, como si fora una gran idega que a él nun se-y ocurriera. Y amplíenlo y ven ellí hasta'l reflexu del güeyu d'un tábanu nun lixu de la carrocería. O cuandu comparen una base datos de criminales con otra base datos que tien un rexistru de les bombilles de baxu consumu que hai puestes en llámpares de plásticu nos alredeores, y el resultáu sal animáu con colorinos. Equí (y nos Estáos Xuníos lo mesmo) les bases de datos malapenes lleguen pa saber quién tien que pagar la contribución.

- Por cómo los policías xulguen y son xusticieros colos malos, y dícen-yos coses y échen-yos sermones; la metá les veces ensin tener razón, además, namás pa lleer el guión de lo políticamente correuto.

- Por cómo los criminales son mentirosos y trapaceros, pero nun momentu dáu, namás con miralos serio, canten como paxarinos, como si los hubiera pilláo la má, ensin abogáu ni nada, y despliquen por qué ficieron lo que ficieron.

- Por cómo unos días lo que val pa atopar pruebes -qué se yo, un análisis d'humedá nel forru'l chalecu'l lladrón- nun se yos ocurre facelo otru día cuandu tan delantre'l mesmu problema, y inventen daqué raro y estravagante pa algamar lo mesmo.

- Por les burraes y tonteríes que faen cuandu trabayen coles pruebes, anque se faigan los cuidadosos. Ayeri queríen ver si hebía un artículo nel ordenaor d'un muertu. El ordenaor tenía contraseña. Fácil: saques un aparatucu maraviyosu, enchúfeslu al USB, y éntrate él. Y entós el CSI busca el documentu pol discu duru y ábrelu tranquilamente. Nun ye que el aparatu esista o non; ye que facer eso con pruebes informátiques ye, direutamente, arruinales. Yo fice un cursillín d'informática forense y hasta ehí llego yo, que nun soi Gary Sinise (anque claro, tampoco pongo la cara d'interesante que pon él).

Total, que en realidá ye una serie permala. Ya se sabe que la ciencia ficción (y la ficción, en xeneral) desixe que suspendas temporalmente el escepticismu, pero namás lo xusto pa que la ficción funcione. Si abusen d'esi conveniu, ye que el guión nun tá bien trabayáu. Sí, ye difícil desplicar coses ensin que lo faigan los personaxes, o atopar maneres inesperáes de dar con una pista ensin que llegue el ordenador a facer un zoom imposible. Pero ye que facer un buen guión lleva trabayu. Nun ye tan difícil facer muncha producción si ye de mala calidá. Metiendo perres abondes pa la producción, que esa va pol carrilín y nun hai qu'inventar tanto, saques p'alantre un capítulu ca selmana. Pero la serie nun va ser buena.

Anque venga de los Estaos Xuníos d'América.