Mocedáes

Güey amuesen na televisión un vídeu de les mocedáes socialistes sobre la asignatura de Educación para la ciudadanía.

Tolos días siento a la xente falar de lo maleducaos que tan los xóvenes, de que pasen de la política, de que van a lo suyo, de milenta coses más. Conociendo como conozo más a los mayores, toi tovía más d'alcuerdu en que fai falta que daquién diga delles coses a los escolinos. Que-yos enseñe coses sobre los drechos humanos, sobre qué pasa cuando otru piensa d'otra manera que nosotros, sobre cómo discutir ensin pedir que el exércitu nos dea la razón.

Los drechos humanos, la Constitución, y otres idegues ya normes, son el conxuntu de principios nos que podemos tar d'alcuerdu. Nun vamos tar toos d'alcuerdu en si Dios esiste o non, o en si ye más guapu un trapu d'un color o d'otru, que son dos motivos pertípicos pa entamar una guerra. Pero hai principios que son, precisamente, los que valen pa que vivamos xuntos, y non revueltos, los que creemos en Dios y los que non, los que preferimos un trapu y otru. Asina, nun me cabe na cabeza que haiga xente que tea en contra de que se enseñen esos principios. Los drechos humanos, la Constitución española, y les demás coses que tan nos programas de Educación para la ciudadanía (que mui poca xente de la que opina sabe).

El vídeu que ficieron les mocedáes socialistes tá bien nesi sen. Y nun ta mal la idega del concursu y les definiciones. Por embargu, el resultáu paezme una patochada, cenciellamente porque lo que ficieron nun foi un exerciciu de ciudadanía, sinon un exerciciu de partidismu faltosu.

Esa babayada tá claro que tien por intención ofender a la xente del PP. Un vídeu que punxera a los que se enfrenten a la asignatura delantre la so contradicción pareceríame bien, y igual convencía a dalgún (dúldolo, pero bueno). Pero esti vídeu lo único que fai ye pretender gustar a los que ya tan na tribu propia, y tocar les ñaples a los que tan na otra tribu. Les razones y la xusticia dexáronles a un lláu. Nun facía falta poner como tontu, con un cocodrilu escomanáu nel niqui, al personaxe de la drecha, nin mentar a Aznar. Ya, ya sé que el PP nun ye meyor. Pero agora toi despelleyando al PSOE.

Cuandu veo cómo son les mocedáes de los partidos políticos, y pienso nel futuru de la democracia, respíngome.

Por favor, pongan esa asignatura, y pónganla tamién na Universidá. A más de ún fái-y muncha, muncha falta.