París

Fai una selmana tuve un par de días en París.

- Curiáu al cruzar la cai. Ye igual que haiga pasu peatones, ye igual que tengas la lluz verde. Si puen pasar, pasen (anque seya por enrriba ti).

- Un par de vegáes entamé a falar en francés... y retrucáronme'n inglés. Home, yo pueo falar francés permal, pero eso de decí-y al del hotel namás que "Bonjour, quarante-huit, s'il vous plaît" y que te retruque "Are you checking out today?" nun lo entiendo. ¿Fastídia-yos muncho a los franceses sentir falar mal en francés, o ye que tengo pinta d'inglés?

- Si merques un pastel o cualquier otra cosa, y lu comes allí mesmo, cóbrante muncho más. Por ca cosa que merques. Así que curiáu colos precios que pon nos cartelos, que puén ser los precios de cuandu marches cola comida perehí.

- Eso sí, pa beber, pónente agua del grifu si la quies, y nun te la cobren.

- El menú del día ye, munches vegáes, pa escoyer entre primer y segundu platu, o platu y postre. Les tres coses, non. (Afamiáos...)

- París ye caro, sí, pero agora nun ye tan astronómicamente caro como enantes. Polo menos, el sablazu que nos pegaron aquí col euru val pa que cuandu vamos fora nun nos paeza tan grave la cosa.

- Hai un límite nel númeru de eficios monumentales ya impresionantes que una presona pué procesar y ablucase. En parís llega un momentu nel que too te paez normal. Pero de xuru que ye la ciudá que conozo con más edificios maxestuosos. (Falamos del centru, claro.)

- Les papeleres de París son un bastidor, un aru, nel que cuelga una bolsa plásticu. Ensin más. Les papeleres más fees del mundu. Nun entiendo que lo faigan asina, colos efidicios que hai (de espatarrar).

- Les ceres tan llenes de bolardos que molesten más a los peatones que a los coches. Munchos bolardos tan metanes la cera, non nel bordillu.

- La Torre Eiffel ye guapa, prestóme, pero cásique presta más vela dende abaxu que dende arriba. Nun xubí arriba del too; xubí "namás" al segundu pisu, que se pue dir andando poles escaleres y la cola ye muuuuuncho más curtia (y más barato). Pa dir al picalín hai que dir n'ascensor. Les coles pa una cosa y la otra tan en pates diferentes de la torre (pémeque la cola pa xubir poles escaleres ye nel lláu sur).

- Fice por ver series o películes de televisión en francés, pero la verdá ye que nun pescancio casi ná. (En inglés pásame lo mesmo; conferencies mui bien, pero la ficción ye difícil.)

- Lo menos impresionante de París igual ye Notre Dame, con tolo famosa que ye. A la xente que fai películes impresiónenla muncho les hestories de xorobaos y de coses antigües y medievales, pero hai que alcordase que Santullano ya tenía sieglos d'antigüedá enantes de que naciera el que fizo los planos de Notre Dame. Home, ta guapa, sí, pero tampoco ye pa tanto.

- Hai que ver qué mal traducen dalgunes coses. Paézme una chapuza increíble que nes máquines de vender billetes pal tren, si escueyes "español", haiga los erros que hai; "nombre" por "númberu", por exemplu. Ye una máquina que usen ca día miles de persones; ¿nun puen atopar daquién que traduzca bien al español? Si fora'n España, pensaríamos que ye una chapuza típica de les nuestres.