Testu n"asturiano Nun entiendo a Julio Bueno

Güey lleí en La Nueva España un artículu que firma Julio L. Bueno de las Heras. Titúlase No con mis estudiantes, asina que hube lleelu. He decir que nun conozo a Julio Bueno, lo que de xuru que ye una carencia mía pergorda, pero al tiempu valme pa nun lleer con prexuiciu dalu.

Y nun lu entiendo.

Fala de comentarios de testu na selectividá que planteguen idegues polítiques determináes, y de lo mal que-y paez. Pero yo nun veo claro cuál ye el razonamientu. Diz que si mos imaxinamos que'n Selectividá punxeran testos de los versículos satánicos, o un argumentariu euxenésicu de Hans Reiter, la escandalera que diba montase. Y eso vál-y pa decir que tampoco tien que haber testos d'izquierdes (nun lleí el testu que-y paeció mal a él).

Nunca nun supe qué hai que facer esactamente nel comentariu testu de la selectividá, pero a mí nun me paez especialmente raro que un estudiante tenga que ser capaz de comentar un testu col que nun tea d'alcuerdu, o anque nun tea d'alcuerdu naide. Como si lu escribió Hitler.

Lluéu, pa retratase como miembru de la drecha civilizada (asina la llama él; a la "poco beligerante") diz qué testos podía suxerir él pa la selectividá: Delibes, Azaña, Moradiellos, Savater, Suso de Toro... y Pío Moa, del que diz que tien el morbo d'haber sido terrorista y el estigma de arrepentise (¿?). Camiento que a Bueno paéz-y bien un testu de Pío Moa como exemplu de testu que nun ye sectariu nin provocaor (aparte de facer una velada defensa d'esi suxetu).

Nun lo entiendo, porque yo nun diría que Pío Moa ye precisamente un esponente de la "drecha civilizada" (de la drecha igual sí, nun sé, pero de civilizáu véo-y poco). Pero tampoco nun diría que ye historiaor, así que debo de ser un ignorante. Bueno diz que nun llegaría a tanto como poner un testu de Losantos o de Luis del Pino... Vélos peor que a Moa. Ya dixe, nun lo entiendo.

Y diz que esa ye la diferencia ente la "drecha civilizada" y la "izquierda sectaria".

¿Cuála ye esa diferencia?

¿Por qué la drecha ye civilizada y la izquierda sectaria?

¿Por qué nun punxo que "esa ye la diferencia ente la izquierda civilizada y la izquierda sectaria", o "ente la drecha civilizada y la drecha sectaria", que como argumentu diba valé-y lo mesmo?

Los dos párrafos caberos del so artículu ya nun ye que nun los vea claros. Ye que nun los entiendo. De verdá. Tal cual lo digo. Nun pescancio lo que quieren decir.

Total, que lo único que saco en claro ye que la drecha gústa-y y la izquierda non. Pero nin sé por qué, nin por qué da tantes vueltes colos testos de selectividá, porque sobre esi tema concretu nun veo que argumente un ren. Lo que fai ye aprovechalu pa falar d'otres coses.

2 comentarios:

Esfer dijo...
Este comentario ha sido eliminado por el autor.
Guti dijo...

Pues esta vegada nun foi tan, tan escuru, pero vamos... ya me va cuadrando lo que lleí y lo de nun entendelu.

Nesos claustros debe de haber que tragar ca cosa...