El Xueves

Montóse una buena alrodiu de la famosa portada de El Jueves sobre les perres que van dar a les parexes que tengan un gua.he. Ya se sabe que el fiscal presentó una denuncia, y el xuez secuestró el númberu. Pue leese el autu equí: páxina 1, páxina 2, páxina 3, páxina 4.

Pa entamar, abúltame too un fallu escomanáu. Porque anque El Jueves (la revista que sal los miércoles, y agora y que secuestren los vienres) lléelu xente abondo, nun ye tanta. Porque mira que nun sacaron milenta chistes burros sobre la monarquía, el exércitu, los curas, los políticos y tolo que se quiera, y nun pasó nada. Porque agora tol mundu vio la portada, que de xuru ye la más vista na hestoria de El Jueves. Diz l'autu del xuez na páxina 2 los motivos pal secuestru de la revista: protexer a los perxudicáos pol delitu, que nun haiga otra manera más efeutiva de facelo, etc. Menuda habilidá. Si (creyendo lo que dicen los dueños de El Jueves) diben ver el dibuxu cuatrocientes mil persones, agora hubieron de velu millones. Yo, por exemplu.

Sobre si'l humor de El Jueves ye bastu, o pasa les llendes de lo llegal... podíemos charrar muncho. Nun ye el mi estilu favoritu, pero préstame lleelo de xemes en cuandu (anque la verdá ye que nunca nun merqué esa revista, pero dalguna vegada la atopé perehí y eché-y un güeyu). Los cómics d'Ivá, por exemplu, cuenten coses que nun pueden contase d'otra manera. Sí, ye un estilu burru onde los haiga, pero ye asina, y dalguna vez apetez reíse con coses burres. Fai falta que daquién faiga eso, fai falta que haiga un El Jueves.

Lo que me paez percurioso ye que el xuez diga que ye una caricatura que afecta al honor y al núcleu últimu de la dignidá de les persones, y que resulta "innecesaria y desproporcionada para la formación de la opinión pública". Entrúgome cómo había que calificar a los que dixeron y dicen que el presidente del gobiernu montó un atentáu con ETA y los islamistas pa dar un golpe d'estáu'n España y ganar les elecciones (resultáu que tovía tienen por ilexítimu), o cómo había que calificar a la COPE y a Losantos, o a los mesmos curas y otres persones que dicen tolos díes que'n España nun tien que haber ciudadanos educáos pa ser ciudadanos y conocer los drechos humanos y la Constitución, que lo que tien que haber son "xente decente y normal" que estudien -quieran o no- Relixón, y que les lesbianes lo que son ye unes goches que nun ye que nun puean tener fíos, ye que si los tienen hai que quitá-yoslos.

A lo tonto, igual agora se despierta un debate sobre la monarquía. Y hai coses que valía-yos más nun meneales.

Espero que polo menos El Jueves viva otros treinta años diciendo burráes. Que, por ciertu, son muncho más intelixentes y muncho menos dañines que lo que tolos días se diz na radio de los obispos españoles. Lo que pasa ye que ellos saben de sobra que nun van dir a ningún infiernu por facer lo que faen. Los de El Jueves tamién lo saben, pero polo menos nun prediquen lo contrario pa los demás.