Cantantes y circu

Muncha xente (demasiada) vive la vida como un circu. Tolo que faen ye pa dexase ver, pa que daquién los mire, y los almire. Anque nun haiga de qué.

Pensélo güey dempués de buscar manera de ver cantar a Etta James. Nun atopé nada que me gustara, pero pue oyise nesti video cómo cantó At Last; el vídeo ye namás que caxigalines, son semeyes de xente dándose besos y tal. Lluéu atopé la versión de la gran Eva Cassidy (QEPD), notru vídeo que ta fechu con cachos de "Lluz de lluna", que tampoco valen pa muncho más que pa alcordase de que Bruce Willis tenía pelu y Cybill Shepherd el sex appeal de ser a la vez sofisticá y pueblerina.

Y entós atopé esti horror:



Ye increíble el dañu que nel sieglu XX y XXI ficieron a la música la industria discográfica en xeneral, y xente como Christina Aguilera en particular. Incluso una aficioná lo fai meyor: más discreto, más contenío, más musical. Lo otro ye circu.

Neños, nun faigáis esto en casa. Ye más difícil tocar poques notes, que munches; ye más difícil tocar suave, que fuerte; ye más difícil cantar grave que agudo. Ye más difícil tener la humildá de estudiar y deprender tola vida que creese un xeniu. Ye más difícil facer les coses de verdá, que de mentira. Y da menos perres. Pero la música nun son perres.

Asina que como contraste a les paxaraes de la Aguilera (que ye una pena, porque nun tien mala voz ni nada, namás que nun tien ni zorra idea) pongo aquí otru vídeo de una gua.ha de 16 años cantando nel colexu, supongo. Fálta-y muncho por deprender, ta claro. Y pa enriba... nun tien la imaxen que los nuesos espertos de la "industria musical" dicen que tienes que tener pa poder sonar bien. Pero a mí gustome enforma más que Christina destripando "At last". Yo pagaría por un discu de esta neña. Por unu de Christina, non.