Mercando'n Amazon

Güey nun foru daquién entrugó qué tal yera eso de comprar por Amazon, y entós entróme la curiosidá y diome por buscar a ver si podía vese qué-yos merqué yo a estos.

Y lo que merqué foron cinco discos. Así que voi poner equí la información, pa que con ella puedan facer estudios de mercáu les empreses eses que nos xixilen pa ver qué compramos, y dónde, y qué mos gusta y mos dexa de gustar. Nun teis enfotáos nel spyware, que nun fai falta: estes son les mis compres n'Amazon (la fecha ye de cuando fice la compra, non cuándo se asoleyó'l discu).

	Xunetu 1998 - BSO de Phantom of the Paradise. Esti discu busquélu en toles les tiendes que me dio tiempu (grandes: Virgin, HMV) cuandu fui a Londres en 1995. Y nun hebo manera. Nun lu teníen (anque tuviéranlu enantes, taba agotáu). Un día diome por mirar n'Amazon, teníenlu y dixe: "Esta ye la mía". Una película que me marcó, y una banda sonora xenial.
	Febreru 1999 - Candyfloss and Medicine (Eddi Reader). La cantante de Fairground Attraction sacó discos ella sola, que son bien guapos. Nun tienen el mismu swing que lo que fizo en The first of a million kisses, pero merez la pena escuchalos.
	Mayu 1999 - BSO de Great Expectations. Nun m'alcuerdo agora mesmo qué cancios me llamaron la atención cuandu vi esta película, pero la banda sonora gustóme en xeneral, y apetecióme.
	Payares 1999 - Jerusalem (Alpha Blondy and The Wailers). Un grupu de reggae. Conocílos por unos amigos franceses cuandu veraneaba en Salas de gua.he, y entrome de sutrucu el rixu por mercar el discu y volver a oyir Kanashnikov Love o Boulevard de la mort o aquello (en francés) de Trabayar ye mui duro, y robar nun ne bueno, y pedir llimosna ye daqué que nun quiero facer más. Qué grandes.
	Setiembre 2004 - Silk City (Barry Mitterhoff). A esti vilu tocar nel institutu de Mieres, xunto a Toni Trischka, y quedé ablucáu (polos dos y polos que veníen con ellos). El grupu facía una triba de bluegrass, anque Mitterhoff fai otres coses; ente elles, polo visto, tamién música klezmer. Silk City ye un discu perguapu. Compráralu enantes, pero nun sé cómo, perdiose. Asina que comprélu otra vez. (De Tony, quiciabes el meyor banjista del mundu, tamién mercara el discu, A robot plane flies over Arkansas, pero nun lu perdí).