Quedar ensin carné sal barato

Va dellos días pudimos sentir a Aznar falar del beberciu y la conducción. Nun ye raro que Aznar diga coses que nun tienen xacíu dalu, más tovía si-y dan pie pa facese el chulo, que ye lo que siempres quiso ser, el chulo'l so barriu. Pero sí me sorprende un pocoñín que otros faigan coses que puedan interpretase mal. Va tiempu que veo un cartel nuna tienda del RACE que me llama la atención. Hube face-y una semeya.

Nel RACE dicen que ellos aniciaron milenta coses rellacionáes col coche: les matrícules, los códigos de circulación, y en fin, que son cuasi los pás de la DGT. Además, faen campañes de seguridá vial y too eso. Tienen una medalla d'oru, y todo...

Pero resulta que nesti llocal tienen un anunciu percuriosu. Aparte de que lo anuncien como oferta de viaxe, y aparte de la falta esa d'ortografía por hipercorrección (sé precursor e adelántate) anímente a quedar ensin carné. Bueno, non lo dicen asina; dicen que quedate ensin carné namás que te cuesta 50 € al añu.

Abúltame raro que los que inventaron (dicen) el permisu conducir vendan con tantes ganes un seguru contra la so perda, digamos que faciendo de abogáos del conductor contra les normes de tráficu.

Home, ye como lo de les vacaciones de Sarkozy. Nun ye que seya illegal, pero nun queda mui guapo.