Xugando a House

Non, non ye que entame a decir barbaridaes a la xente (piénsoles de xemes en cuandu, pero nun les digo). Nun me paez tan cool eso de dir cortando a la xente. Hébolo tola vida, y siempres tuvo un nome: ser faltosu. Y ser faltosu ye malo, anque pola tele preste velo. Pero ye la tele.

Va dellos meses que tengo una tendinitis tremenda nos tendones d'Aquiles. Como tengo'l vezu d'usalos abondo (bah... pa caminar, y eso), tan tol día doliéndome. Nun pueo correr, y dellos días pásolo canuto pa baxar les escaleres. Ya tuve nel mélicu (un bon mélicu, esa ye la verdá), ya fice dalgún tratamientu con antiinflamatorios, y xelu, y plantiyes de silicona... Y meyoré un pocoñín, pero col tiempu torno a tar igual.

Tamién fai unes selmanes que me duel el costazu drechu. Entamó a doleme a lo tonto. Como ye onde me apoyo pa dormir, pensé que igual yera por eso (hebo una temporaúca que me dolía'l brazu a la altura'l coldu, y dime cuenta que yera por una postura al dormir; non la puse más, y pasóme). Y fui dándome cuenta que toi fechu con malos materiales, porque son too averíes.

Y el llunes pasáu, vi la lluz. Camenté que esto diba ser cosa del ácidu úricu.

Enxamás tuve noticia nenguna de que'l ácidu úricu pudiera dar tendinitis. Yo ya tuve'l ácidu úricu altu va dellos años, y entós dolíame enforma la articulación del deu gordu'l pie drechu. Fui al mélicu pensando que yera una lesión (de aquella xugaba al baloncestu) pero él dixo que diba ser el ácidu úricu, y diome una dieta (y... matemático). Hai que dicir que yo nunca nun fui de comer mariscu nin caza nin carne roxa; siempres fui mui normalín pa comer, pero tengo tendencia a tener altu l'ácidu esi. Cola dieta esa... quitáronme casi too lo que comía. Nunca na vida pasé tanta fame. Dende aquella, si me xubía un pelín l'ácidu enseguida me dolía el déu. Controlaba un pocoñín la cosa, y arreglao.

Agora, con estos dolores tan raros pensé que va tiempu que nun miro lo del ácidu úricu, y que si fai cristales nes articulaciones, por qué nun va facelos nel tendón; y si hai cristales nel tendón, ye normal que se inflame.

Voy pa'l Google y pa tendinitis "ácido úrico" salen 13.300 páxines. Tobillos, rodilles, coldu y costazu tan nel puntu mira... Mira qué bien.

Da la casualidá que'l llunes pasáu ficiéronmos un análisis de sangre y mexu onde trabayo. Nun tengo los resultáos, y además nun soi mélicu, y esta nun ye manera de diagnosticar nada, y nun faigáis esto'n casa. Pero yo apuesto a que tengo altu'l ácidu úricu.

De momento, ya entamé a facer dieta (non, nun toi auto-medicándome; ye que esta dieta nun me va venir mal de toes maneres) pero la cosa ta fea, porque nun se pue comer ná. Bueno, nun ye namás que una apuesta, un xuegu que nun me va facer mal. Ya veremos si acerté o non.