A cerrar universidáes

Diz El País (puntocom) que el 75% de las titulaciones no tiene suficientes universitarios para ser viable. Así de fácil. Y la ministra Cabrera, tan contenta: "Habrá que adoptar decisiones trascendentes. Que esto no suene a amenaza, prestaremos todo nuestro apoyo para este proceso de reformas". Cuandu falen de reformes, hai que echase a tremar.

Voi mordeme la llingua, pero apetezme apuntar delles coses.

- Lo primero: eso de que tien que haber 125 alumnos pa que una titulación seya viable sedrá un estudiu mui seriu, pero de xuru que rebatible. Como somos igual que borreguinos, tragamos lo que mos dicen. Pero esti señor del estudiu -Pedro Reques- hebo partir de les consideraciones de qué-y paez a elli que ye una titulación viable, y pa eso hai que definir enantes pa qué sirve una titulación, o cuándu sobra. Si lo de los 125 ye cosa mercantil, de perres, soi capaz de entamar a pegar berríos.

- Apetezme tamién facer notar que Pedro Reques nun foi escoyíu en procesu democráticu dalu, y que nun ye él el que decide, nesti país, lo que se fai cola enseñanza pública. Por mui espertu que seya. Ministra, la encargada de dirixir esto ye usté, y usté ye la responsable de les decisiones que tome.

- Dicen nel periódicu: "Por financiación y metodología docentes, los expertos calculan que menos de 125 alumnos nuevos cada año en una facultad para estudiar una carrera no es una cifra viable." Ehí lo tienes. Señores míos: lo de la financiación nun ye nengún dogma. Les perres salen de un lláu o de otru, na más. Naide nun dixo que nuna universidá nun se pudiera "perder perres" (con toles comilles del mundu), ni na sanidá, ni en nengún serviciu públicu. Cinca la metodoloxía docente, contra menos alumnos, meyor, y puntu. Así que eso de los 125 puen metelo nel culu. Coño, ya.

- Del estudiu dexen fuera les priváes y la UNED. ¿Por qué? ¿Nun sobren universidáes priváes? Vuelta la burra al prau: tan falando namás que de perres, de instituciones que nun-y cuesten nengún dineru al estáu y se caltengan soles, non de educación.

- Otra perla: "La escasa movilidad de los estudiantes -alrededor del 90% de los nuevos universitarios estudia en la región o provincia donde ya residía- es parte del problema." Por favor, que daquién me desplique por qué coyones ye un problema que un alumnu estudie na rexón onde nació. Paez que lo que hai son ganes de putear al estudiante o a la so familia. Sedrá que en Madrid o Barcelona hai xente con pisos pa alquilar que nun los coloca, y a estos señores del estudiu yos preocupa. O que España ta enllena de families a les que-yos sobren les perres, y al tener al gua.he estudiando'n casa nun les gasten como deberíen. Debe paece-yos poco la de families que hai hipotecáes hasta la cañamina. O deben de querer que estudien namás que los señoritos, como enantes.

- Y falen de beques de movilidá: "recibieron una beca de movilidad, de unos 3.450 euros anuales de media.". O sea, que si estudies notru sitiu, dante 3.450 euros de mierda. De xuru que cuando un príncipe va a estudiar a Canadá (¿sedrá movilidá bastante?), o los fíos de Aznar a los USA (o los de Rubalcaba si los tien y van, que me da lo mismo y nin lo sé nin m'importa), se arreglen con mediu millón de pesetes por añu. (Pémeque van nuna chalana, dando remos, porque nun-yos da ni pal avión). Ya, dientru la península nun faen falta la chalana ni el avión, pero con tres mil euros nun compres ni los llibros.

Total, que el que la xente probe estudie cerca casa nuna institución pública ye un problema gravísimu. Y hai que cerrar tolos centros que nun tengan 125 alumnos nuevos ca añu, porque eses perres hai que gastales en... ¿qué?

Y el nuestru Rector diz que'l mapa universitariu foi "más guiado por impulsos políticos y territoriales que por la oferta y la demanda". Conozo yo un centru que posiblemente baxe pronto de eses 125 matrícules, pero apetecíame entrugá-y, cuando esi centru llenaba tolos años les 240 places y dexaba fora montones de xente, ¿por qué nun tenía llaboratorios, nin profesores suficientes, mentantu otros centros yeran privilexáos con medios, espacios y profesores anque nun-yos facía falta nenguna? ¿Acasu taba la so xestión como rector guiada pola oferta y la demanda? Porque entós habré aportar a la conclusión de que non, de que yera una cuestión de incotrolables impulsos políticos y territoriales.

Voi parar equí, porque como siga voi cabreáme de verdá y nun se pué escribir en caliente. Ya me toi moyando demasiáo.