Testu n"asturiano Otru blues

Da la casualidá de que'l otru día punxe equí un blues, y güei voi poner otru. Trece años dempués...

Van dellos meses que toi diendo a clases de guitarra con Marco Martínez, un guitarrista perbuenu. Pa mí ye un luxu que daquién comu él intente enseñame un pocoñín de lo que él sabe facer. Un exerciciu que nos mandó Marcos esti añu foi preparar un estudiu, un solo de blues, nel que apliquemos dalguna de les coses que tamos viendo'n clase.

Ansina, tuve preparando un solo col envís de que nun seya el típicu solo pentatónicu que llevamos tola vida faciendo los que nun sabemos tocar muncho (y dalgunos de los que sí saben). Tratábase (pa mí) de que sonara más bien jazzy. Nun tien muncho; escales mixolidies, dalguna semidisminuida, pentatóniques (cómo no), un pocoñín de playing out y dalguna frase de les que vimos en clase.

Esti solo nun val pal exerciciu, porque nun ye exactamente lo que mos pidió Marcos, y tengo que facer otru. Pero dempués de cavilar nél, y comu tien dalgunes idegues que puen aprovechase, quise grabalu pa dexalu apuntáu'n dalgún sitiu. La base que m'acompaña ye una banda de Jamey Aebersold, y vese bien qu'ellos sí son músicos de verdá.

Estudiu de blues en Si bemol [MP3, 1,9 MB]