Testu n"asturiano Obregón

Sí; voy falar d'Ana Obregón.

Pero non porque m'interese Ana Obregón. Faigo por nun vela nin saber ná d'ella. Cenciellamente, lo de Ana Obregón ye una escusa pa falar de nosotros mesmos. Tamién quiero ver si soi capaz de falar d'ella ensin insultala. Nin una vegada.

Antena 3 retiró la serie nuea d'esta perimportante actriz, direutora, guionista y presentadora, prototipu de la muyer total, de l'artista renacentista. Voi pensar que lo que pon el periódicu ye verdá.

Si ye verdá, hai qu'afletar qu'Antena 3 ya la productora "depositaren espectatives" nel proyeutu. Namás que esto ya ye daqué que fai pensar. Daqué triste. Porque nun sé qué imaxen tienen Antena 3 ya la productora de los espectaores españoles.

Diz el periódicu qu'esta serie yera "una de les grandes apuestes d'Antena 3 pal horariu de másima audiencia". Otra vez, ponme mui triste qué cuiden los xefes d'Antena 3 de los ciudadanos que ven la televisión, si esto que fai la gran artista ye una de les sos grandes apuestes.

La xenial actriz diz que "si llega querer audiencia taría entovía'n Ana y los 7, pero busca la calidá, non l'audiencia". Tengo d'almitir que nun vi esta serie (en titulándose Elles ya'l sexu débil... nun podía esperar muncho más que poneme gafu a los cinco minutos de vela, ansina que ye meyor facer otra cosa cualquiera). Pero, polo que diz, hai que pensar qu'esta serie yera de calidá... d'alcuerdu colo qu'esta polifacética ya intelixente muyer entiende como calidá. Eso diz muncho de la so idega de calidá, y tamién de la so capacidá pa mentir d'una manera tremenda.

Quitaron la serie pola so baxa audiencia, y hai que felicitase por eso. Cuandu entamaron con Ana y los 7 (serie que enxamás vi tampoco) paecióme que la xente diba da-y pocu menos qu'una patá nel culu y decí-y que marchara coles tonteríes pa otra parte, pero... anque enxamás lo entendí, la serie viola bayura de xente, y echáronla ¡durante dos años! Diba dicir qu'esta vegada los mis conciudadanos nun me defraudaron y ganó'l sentíu común.

Pero nun convién engañase. "Baxa audiencia" quier dicir que namás taben viendo la serie 2.696.000 presones nel primer capítulu, y 2.000.000 nel segundu. El día que'l share baxó lo bastante pa que la mandaran pa casina, hebo alredol d'un millón de presones viendo a la musa de les artes.

Ye como pa ponese a pensar.

¿Qué capacidá d'aguante tienen los espectaores españoles?

¿Cuántes perres costó esta obra de arte? ¿Cuánto cobró Ana? ¿Cuánto cobró'l directivu que-y encargó crear esti universu d'entepretación y lliteratura?

¿Merecen -merecemos- los espectaores otra cosa que nun seya una tercera serie d'Ana Obregón?

Y la verdá ye que tolos axetivos que puse enantes pa falar d'Ana yeren un esfuerciu pa nun insultala colo más fuerte que se m'ocurriera, y pensara en desfogame nel párrafu caberu ya insultala tolo que nun la insulté equí arriba. Pero, una vez qu'aporté a esti puntu, pémeque voy conteneme y nun decir ná más.

Polo menos, güei Ana Obregón fízome meyor presona. (Anque agora mesmu duelme la llingua de mordémela...)

No hay comentarios: