Testu n"asturiano Maníes eficaces Testu n'asturiano

Nun sé si ye por ser informáticu, pero tengo delles maníes qu'abúlntenme chocantes. Pa entamar, son maníes alquiríes; nun son tics, son menes de facer les coses que decidí un día y que esfuérzome pa seguiles.

Un exemplu. De cutio nun llevo xerséis, pero si daquién me ve quitar un xerséi, va ver que lu quito dexándolu del revés.

Pue paecer que cenciellamente soi malcuriosu. Pero nun ye asina. Quítolu del revés, porque dempués póngolu entamando del revés. Meto la cabeza nel furacu, garro les mangues, y de la que-y doi vuelta, quédame puestu. Faigo lo mesmo coles camisetes y coses parecíes. La cosa ye tovía peor: si llevo puesta una camiseta y encima un xerséi, quito les dos coses xuntes, dexándoles del revés una dientro la otra. Al poneles, faigo al contrariu, comu dixe enantes, y pongo les dos de un golpe.

Coles camises nun faigo asina; eses, quítoles comu les hai que quitar, y póngoles na percha del drechu. Los calcetos tampoco los dexo del revés; déxolos siempres del drechu, manque seyan pa lavar.

Otra cosa que faigo ye que, cuandu pongo los cubiertos nel lavaplatos, ordénolos por tipu. El mi lavaplatos (pémeque toos) tien una caxina plásticu, con apartaos onde se meten los cubiertos. Pues al principiu metíalos onde pintaba, pero un día cambié de métodu y agora meto les cuyares nun apartáu, los cuchiellos notru, les cuyaruques notru, y asina. ¿Pa qué? Tampoco nun ye manía. Ye que lluéu, dempués de lavalos, al metelos nel caxón hai que meter cada cubiertu nel su sitiu, y yera mui pesao andar separtándolos (pentre los cuchiellos y los tenedores, que pinchen) amás de tomame tiempu. Por embargu, separtalos cuandu los meto a lavar nun me cuesta ná, y asina cuandu los guardo garro cada tipu de cubiertu d'un puñáu y azótolos al caxón, y acabé.

Nu sé si tol mundu anda cavilando asina so les coses que fai, ordenándoles y dándo-yos la vuelta pa echar menos tiempu, aforrar enerxía... ¿Sedrá normal lo mío?