Nun duel

Nun soporto les corrides de toros. Nun tengo nengún interés no que pasa nelles. Pero delles vegáes entérase ún, ensin querer (como pasa col fútbol). Y güey enteréme de que a un toreru clavóse-y una banderilla na pierna. Equí al lláu ta la semeya que-y ficieron cuandu lu sacaben pal mélicu.

Ye curioso que ponga esa cara de dolor. Ya oyí munches veces dicir a estos fatos coses tan tontes comu que a los toros nun yos duelen les banderilles, pola adrenalina o nun sé qué. ¿Ye que esti taba toreando ensin adrenalina? Nun lo entiendo, porque él lleva namás una banderilla, pero al toru pónen-y media docena. Tampoco sé pa qué lu lleven a la enfermería; esta banderilla que se-y clavó a él ye una que-y cayó al toru y al toru nun lu llevaron a la enfermería. Y además, si nun duel que te la pongan, tampoco dolerá quitales, digo yo. Esos que tan ehí con tantu pruyimientu podíen sacá-yla y carretera, a seguir toreando. El toru tien que seguir trabayando pase lo que pase, y si nun embiste llámenlu mansu.

Nun pretendo ser truculentu, pero el sangre nun ye idega mía; ye d'ellos. Son ellos los que-y lo saquen al toru. Son ellos los que lo consideren motivu de fiesta. Asina que, según lo que ellos mesmos dicen, esta semeya ye una fiesta (nacional, además). Tien que presta-yos vela. Lo único que nun sal nella ye'l toru, pero polo demás hay banderilles, toreros y sangre. Como pa pasalo bomba. El toreru tamién ta pasándolo bomba, ¿non? Que disfrute de la grandeza de recibir les banderilles en propia carne, que se supón que los toros tienen que disfrutalo.

Anque ponga cara de dolor, nun vamos pensar que seya un toreru mansu. Home, non.