Testu n"asturiano ¿Llocos? Testu n'asturiano

Citando a Astérix ya Obélix, a los que los franceses paecen querer muncho, nun sé si pensar que "tan llocos, estos franceses". De xuru, nun me refiero a tolos franceses; namái que a dellos políticos franceses.

Villepin ye un paisanu que me tien mui impresionáu, porque fala delles llingües, ente elles el español, perfeutamente, y tien pinta de ser lo más llisto que hai baxo la capa'l Sol. Según diz una amiga mía francesa, "ta mui buenu", encima. Pero nun entiendo lo que fai cola llei esta del despidu llibre (sí, vamos llamala asina, que lo de "llei del primer emplegu" paez broma). Resulta que ta tol mundu'n contra, protésten-y toos, ya van dos güelgues xenerales (encima, dempués de tolo que pasó nes revueltes de los barrios), contra una llei que teniendo tola importancia del mundu pal pueblu nun se debatió nel parlamentu... y a él éntra-y per una oreya y sál-y pela otra.

Hai que tener munchos... eso pa caltener la so postura desta manera. Almojor ye que hai que ser asina pa poder ser primer ministru nun gobiernu, nun sé. Pero ún, nestos casos, siempres piensa qué-y pasará pela cabeza al políticu. Villepin nun ye tontu, ya lo dixe. Dalgún motivu ha tener pa facer lo que fai. Deberá favores a los empresarios, o será que de verdá fai falta tener a la xente esclavizá pa que la economía marche. Pero dende fora, ún piensa: "Tan llocos, estos franceses" (insisto: nesti casu, suponiendo que'l únicu francés que hai ye Villepin).

Lluéu, resulta que'l presidente, el nuestru amigu Chirac de les bombes atómiques, diz que sí, que la llei esa fecha a traición entra en vigor, pero ensin aplicase. Yo nunca nun creyí que pudiera esistir cosa tala (¡una llei en vigor que nun se pué aplicar!), así que vuelvo a pensar: "Tan llocos, estos franceses" (agora sí, falando de dos franceses, que son Villepin y Chirac).

Pues nun sé, sabiendo comu saben que la xente va echase a la calle, que van ponelos a caldu, fáenlo igual. Espero que'l pueblu francés nun s'escaeza de esto (¡igual lo que piensen Villepin y Chirac ye "a ver quién cansa primero"!) y ponga a cada cual nel su sitiu.