Idegues pa escribir

Ayeri, dempués de pensar nel Quixote, y amestar esos pensamientos con otros, paecióme que la naturaleza y la humanidá evolucionen d'una manera complexa, y que ye mui interesante cómu les coses tomen vida propia. Unos pocoñinos quarks améstense con otros d'una mena mui cenciella, y faen átomos, y esos tamién se rellacionen siguiendo unes leyes cencielles... y les coses combínense, y améstanse, y xeneren otres nueves, que se amesten de maneres nueves, y bien lluéu tenemos montáu un sistema con vida propia. De unos quarks aportamos a un coral que baltia, o un celebru que camienta; y de ehí a una sociedá supercomplexa, y de ehí... Estes mezcles realiméntense, recombínense, creen coses nueves hasta'l infinitu. Lo que paecía un fin en sí mesmu lluéu nun ye más que'l ladrillu pa facer otra cosa.

Viendu l'exerciciu que fizo Cervantes nel Quixote, faciendo a la primera parte del llibru apaecer na segunda, paézme que ye interesante (y tampoco ye una idega nueva, tá claro) plantegase que los llibros, que en principiu yeren una manera de xuntar idegues y conservales, ya va muncho que cobraron vida propia y de ser un fin en sí mesmos pasen a ser átomos pa otros xuegos nuevos, muncho mayores. Así funciona esti mundu. Y en sabiendo esto, prestaríame intentar escribir daqué usando los llibros como personaxes. No, nun toi falando d'una fábula con llibros envede animales. Toi falando de daqué más intelixente. Cervantes ya fizo algo semeyo, o Pirandello, o milenta otros; pero prestaríame facelo a mí, a ver qué salía. Plegar el llibru sobre sí mesmu, facelu intervenir na hestoria. A elli y a otros.

Igual un día me pongo.