Vientos d'agua... y III

Ya tá.

El vienres pasáu, como otros vienres, miré'l teletestu de Tele 5 pa ver a qué hora echaben Vientos de agua. Les dos menos diez de la mañana. ¡Como pa quedame a vela! Programé'l vídeo y marché pa la cama.

Ayeri la mi muyer díxome que nun grabara nada de Vientos de agua. Que na cinta hebía nunsequé de la teletienda y coses tales. Yo díxe-y que yo namás lleera lo que poníen nel teletestu, y que si nun lleí mal, sería que ellos lo punxeron a otra hora.

Nun fuera asina. Ye que cenciellamente nun lo punxeran. Quitaron la serie. Ensin avisar, claro.

Lo más gordo ye que dicen que pararon de echala porque van sacar unos DVD y nun quieren que la xente piratee la serie por Internet, que ye lo que ta pasando.

Menuda panda de mazcayos.

Lo bueno de un blog ye que les coses escríbense cuandu s'escriben. Tá claro que yo sabía va tiempu que'n Tele 5 (y lo mesmo nes otres cadenes) nun yos importa pa nada'l espectaor. Pero esto paezme dir más lloñe: ye tomanos el pelo.

Pola mi parte, van rise de su madre. Ya sabía que nun diba ver terminar Vientos de agua, y tampoco ye que m'importe muncho. Si pueo, voy procurar vela dalgún día cuandu tenga ocasión.

Pero eso sí, señores de Tele 5: nunca, nunca, voy comprar los DVDs que quieren vendeme.

Y otra cosa que camiento: hai coses que xustifiquen la piratería.

Nota: Pa que compares esti blog con lo que ye escribir bien, lee lo que dixo el mi almiráu Antonio Rico en La Nueva España (en castellano).