Deteníu pol tabacu

Güei dicen na televisión y nos periódicos que detuvieron a la primera presona n'aplicación de la mal nomá llei antitabacu. La noticia tien coses buenes y males.

Les males son les que tienen que ver col periodismu. Pa mí, esa llei nun ye antitabacu; ye una llei de defensa de la salú. Al emplegar esi nome paez que los fumaores faen bien en ponese comu víctimes. Otramiente, nel titular de El País dicen "a consecuencia de la Ley Antitabaco". Suponiendo que seya correuto dicir "a consecuencia de", que nun me suena mui bien, a esi paisanu detuviéronlu y multáronlu por un delitu de desobediencia a los axentes. Non por la llei del tabacu. Lo mesmo podíen titular que lu detuvieron "a consecuencia de estar en un restaurante". Nun son más que circunstancies.

Les buenes son polo menos dos. Una, que al día siguiente pola mañana el paisanu ya taba xulgáu y multáu. ¡Va ser verdá que la xusticia funciona! Eso sí que ye una noticia de primera páxina.

Otra, que los policías ficieron cumplir la llei. Alcuérdome que va poco díxe-y a un policía nacional nel Aeropuertu d'Asturies que taba fumando (¡él!) un puru nun sitiu nel que nun se podía fumar. Envede pedir disculpes y apagalu, entamó a desplicame que tenía'l puru apagáu, y tamién (axudáu pol collaciu) que ellí podía fumase, que la zona de non fumaores taba más p'allá... Y dempués de dellos viaxes n'avión, nunca nun vi a ningún guardia civil de los que xixilen les cintes de recoyer les maletes decí-y a ningún fumaor (y había milenta) que nun se podía fumar ellí.

Así que, polo menos en Navarra, les coses van pa meyor. Aleluya.