Un aplausu

Les coses rara vez son perfechamente blanques o negres. Nin les coses, nin les persones.

Hai comportamientos buenos, y malos. Y lo más normal ye que, incluso na mesma persona, haiga de los dos.

Dempués de tola vida siendo "el que nun sal al pinchu", toi que nun me lo creo. Toi diendo a tolos bares nos que no entré na vida. Toi conociendo sitios que nun sabía nin cómo yeren por dientro; o diendo a comer a sitios nos que nun entraba dende fai, ensin desaxerar, diez años. Entres, y güel a café. A chocolate. A llimpio. Apetez quedase.

Güey mesmo, delantre un chigre, hebía un grupu mozuques fumando. Al sol, veíase la nube fumu que facíen. Yera increíble. Ye increíble que eso, que na cai ya paez de verdaderu escándalu, enantes se ficiera dientro del bar. Increíble.

Pero he dar un aplausu a la mayoría de la xente. Hai xente becerra, en Castellón, en Marbella y en tantos sitios; pero he decir que, hasta agora, paez que son esceiciones. En tolos sitios nos que asomé el focicu, el aire taba llimpiu. Ta respetándose la llei. Ta funcionando.

Notres coses pónenme de los nervios, sí; sobre too les coses que se dicen. Pero lo que se fai bien, se fai bien, y lo xusto ye reconocelo. Los fumaores, como clas (y xeneralizando) nun camudaron los sos vezos polos drechos de los demás, y esi estigma van llevalu pa siempre. Pero polo menos sí camudaron los sos vezos por respetar la llei. Y respetar la llei (una llei como esta, polo menos) ye perimportante.

Y tengo que dar, de verdá, un aplausu a toos esos fumaores que NON tan encendiendo el pitu onde nun deben. Toi impresionáu. En serio. Quítome el sombreru.