Testu n"asturiano La güelga

Nun soi un espertu'n coses sindicales. Nun sé nin lleer bien la mi nómina, nin cuántos días hai de fiesta al añu.

Pero sé que ca drechu que güey tienen los trabayaores costó muncho, muncho tiempu algamalu. Caún. Y que la mayoría va mui poco que s'algamaron. Antes d'ayeri, como quien diz, tovía tábemos nel feudalismu. Y tovía falten munchos drechos por algamar. El casu ye que la constitución diz que tienes drechu a trabayar, pero nun lu tienes. El tu trabayu nun ye prioritariu pa naide. Los beneficios de les empreses y bancos, sí.

Esti gobiernu, cola escusa d'una crisis que nun tien nenguna rellación cola regulación llaboral, aprebó una reforma d'esa regulación. ¿Ye esa reforma pa repartir el trabayu, pa poner los drechos de los trabayaores por enriba del beneficiu d'unos pocos, ye pa dalgo que puea ayudar a los que tan na cai? Non. Se mire como se mire, ye una reforma que fai más fácil y barato despedir y más fácil incumplir compromisos alquiríos colos trabayaores (non, al revés non; la flexibilidá ye namás pa un lláu).

Ye un pasu atrás. Algamóse poco, queda muncho por facer, y encima damos un pasu atrás.

Pa protestar contra eso, como trabayaor, entre elecciones, el recursu que tien ún ye la güelga. Ye la manera de decir que "no". Hebía ser indefinía, hasta que se retirase la reforma. Bueno, por supuesto ye opinable si la reforma ye buena o non. Pero nun siento a naide decir que ye buena.

Y lo que recibo nel corréu ye...

CSIF diz que nun pue "pedir a los emplegaos públicos otru esfuerzu". Y eso anque nun-yos guste la reforma, pero llámenla "tardía, parcial e insuficiente". O sea, que la reforma tenía que facese enantes, abarcar más campu y ser más profunda. Toma.

SIPU tampoco quier la güelga, y diz que ye porque ta convocaa por CCOO ya UGT (quier que reconozan nunsequé culpes), porque namás ye pa maquillase la cara... Les sos razones son toes rellacionaes con CCOO y UGT.

La xente, muncha xente (de la poca que pué facer güelga, digo), diz que nun va a la güelga porque pierde perres. Esi ye'l razonamientu principal. El xornal d'un día importa más que un cambéu na llei que rixe les rellaciones entre vasallos y señores, y que fortalez a los señores.

Y too ye falar de coses que nun tienen que ver colos drechos llaborales nin cola reforma: que si tenía que habese llucháo enantes, que si el gobiernu, que si los sindicatos, que si los lliberáos, que si tal y que si cual.

Tolo que pueo decir ye que esta crisis foi una xugada maestra de los bancos, los ricos y los poderosos. Ficieron lo que teníen que facer, ficieron les perres, vaciaron les arques públiques, y agora tienen a los trabayaores enfrentaos... sí, colos sindicatos y col gobiernu y colos funcionarios. Tienen otra vez la tasa de paru onde-yos convién (muncha carne fresca, o sea, carne barata). Va años teníen que enfrentase a xente dispuesta a llevar toletazos y a que-ys arrancaren les uñes nun calabozu sólo pola dignidá, y güey los que puen facer güelga nun la faen pol xornal d'un día y porque-yos cai mal Toxo.

Enhorabuena, chavales.

1 comentario:

Anónimo dijo...

Causa: crack del sistema financiero.
Efecto: crisis.
Solución: recorte de los derechos de los trabajadores.