¿Ónde ta Amnistía Internacional?

Digo, pa defender a los probes militantes y cargos del PP, que tan perseguíos nun estáu policial que ni Stalin, oye. Primero aquella tremenda detención ilegal a militantes del PP que nun-y ficieron nada a Bono (nes semeyes taben cantándo-y una canción de bienvenida), y agora llevar a los deteníos con esposes; ónde se vio. Ni les tortures de Pinochet, vamos.

Falando más en serio: nun sé si esa manera d'esposar a los deteníos ye habitual o non, nin sé si el tratu foi tan vexatoriu como dicen. Yo nun reparara nello. Pero supongo que eso pue verificase, aparte de lo que cacareen unos y otros. La Policía ta farta de facer esti trabayu, y sabrá cómo se fai de cutio. Así que pue aclarase falando colos polícías.

Agora, a lo que voy yo, y pa lo que quiero aclaraciones, ye si el delegáu del gobiernu tien ente les sos competencies decir si hai que esposar a un deteníu o non. Dicen, defendiéndose de les acusaciones del PP, que él dio la orden de nun esposar a los deteníos pero desobedeciéron-lu. Y yo nun entiendo qué pinta un delegáu diciendo que nun esposen a daquién. Si la policía camienta que nun fai falta, nun los esposará, y si camienta que sí, fadrálo. Nun sé a qué obedez esi tratu de favor.

Así que a mí preocúpame saber si el delegáu del gobiernu pue intervenir nes detenciones d'esa manera. El so argumentu non me paez una defensa, sinon lo contrario. ¿Dalgún policía na sala?