Testu n"asturiano Sicilia (II): Reflexiones en el aire

El tráficu en Sicilia ye de llocos. Hasta que te aveces a ello.

Les normes son orientatives. Cuandu aportes a un cruce, lo de la prioridá, los cedas, les señales... ye papel moyáo. Tú metes el morru abondo, y ye fácil que te dexen pasar (lo de menos ye la preferencia). Si nuna cai caben tres coches a lo ancho, pues entós hai tres carriles, o pué ser que cuatro o cinco (y les motos van pel suyu, ye decir, pel contrariu; ya sabes que tienes que dexar un metru del to carril pa les motos que vienen de frente). Les colisiones evítense por centímetros (vi una moza pasar pentre los coches que me dio un escalofríu, y ella tan tranquila), si tienes que dar media vuelta dasla y pares tol tráficu del to carril y del contrariu (eso de guetar la siguiente glorieta o dar vuelta a la mazana ye incomprensible), pero sabes que nun van pitate ni facete xestos, porque tol mundu conduz asina, ye lo normal. El conceptu vien a ser como andar pela cai; cuandu vas pela acera nun vas pela mandrecha o la manzorga nin cedes pasu; vas, ves a la xente que anda alrodiu tuyu, vas a lo tuyo, pases perequí o perellí si hai sitiu, y ya tá. Nun ye ná raro ver coches pervieyos, que nun sé si pasen dalguna ITV:



De lo de aparcar había pa escribir un llibru. Lo primero ye que hai coches perdayures. Si quies sacar una foto a una ilesia, sabes que delantre va haber milenta coches. Sí, igual ta prohibío, pero... en fin. Esta plazuca tenía más coches que'l parking de Salesas, y sí, taba prohibío aparcar en toa ella (véanse les señales). Esta foto ye un cachín namás, porque yera imposible sacalo too:



Un métodu típicu ye que, cuandu quies parar, metes el morru dica la acera, dexando el culo fuera, y ya tá (¿facer maniobra p'atrás? Quita, ho, si ye pa un momentu namás). De xuru que ocupes mediu carril, pero los que pasen ya se aparten, caben de sobra, llibren, etcétera. Naide va enfadase contigo por tar estorbando. Equí se ve un exemplucu:



Anque tampoco diz verdá, porque esto faise tamién anque teas na avenida principal con tol tráficu d'Italia pasando al to lláu. Esto ye'n Palermo, y nun emplegaron el métodu "meto'l morru" porque nun hebía ni sitiu. Poro, déxase el coche en doble fila y tampoco pasa ná:



Les rayes del suelu tamién son decoratives más que nada (continues, discontinues, dobles continues... vien a ser too lo mesmo). Esti nun ta terminando'l adelantamientu apuráu; ta... entamando (la raya continua venía de kilómetros). Nun foi una semeya con suerte, ye que sabíamos que diba adelantar.



En fin, que esa ye la realidá de conducir en Sicilia (y supongo que nel restu Italia). Ún entrúgase qué fadría falta pa que tol mundu entamara a conducir con arreglu a les normes... Tien que ser dalgo titánico convencer a tolos conductores de que respeten les señales, les prioridáes, de que faigan por nun estorbar nada a naide, de que escuendan los coches envede dexalos onde pinte... La cosa nun ye namás poner multes o coses así, abúltame que fadría falta un cambéu de mentalidá tremendu. Ye otra manera de entender el tráficu, y el comportamientu, y les normes.

Por embargu...

En tol tiempu que tuve ellí, ni una sola vegada tuve que escoyer un sitiu pa comer pensando en otra cosa que el preciu o el menú o el sitiu. Hasta en sitios que taban hasta arriba de xente, nun hebo nengún problema col fumu. Nin en sitios más o menos caros, nin baratos, nin tienduques, nin tiendones, nin en pueblos, nin en ciudáes importantes.

Nun se fuma en restaurante dalu.

Prohibióse nun momentu dáu, y cúmplese la norma, y nun paez que se abrieren les catarates del cielu. En xente tan avezáa a dir por llibre, tan temperamental, cola que paez imposible que se respete una llinia doble continua (que sí, que se adelanta tranquilamente), nun hebo problema pa que fumaren notru sitiu.

Spain is different. Equí paez que si toques un pelu a un fumaor tas cometiendo un sacrilexu.