Formigues salvando los güevos

Literalmente.

Al llevantar una chapa fierro del suelu, apaeció un formigueru, una habitación grande (pal tamañu d'elles, supongo) llena de güevos de formiga. Al momentu, les formigues volviéronse lloques pa guardar los güevos notru sitiu, y lleváronlos toos dafechu, munchos d'ellos pa la galería d'abaxo a mandrecha.

Paecióme interesante, y eché a correr pola cámara. Tovía llegué pa sacar la semeya, y pa grabar un vídeu percurtiu onde se ve cómo guarden los caberos güevos. Hebía polo menos el triple.

Al llevantar otres chapes perellí cerca, en casi toes hebía formigueru; otru con otres formigues y güevos muncho más grandes. Nun sé si el fierru guarda'l calor del sol y yos gusta, o si al furar p'arriba topeten y ven que el techu ye sólidu y ellí faen sales y pasiellos. Siento estropiayos el inventu, pero... tenía que facelo, nun foi por gustu.

La vida ye fascinante.