Concursu d'idegues en TVE

Javier Pons ta percontentu porque en TVE ficieron un concursu d'idegues pa facer programas nuevos y víno-yos al maxín una idega buenísima. Ye un programa que va llamase "Cabezas de serie" y ta dedicáu... a los grandes éxitos del deporte español. Esi ye el nuevu programa pa los sábados na 2.

De xuru que en TVE non hebo nenguna idega meyor. Y que facía falta el concursu pa que se-yos ocurriera esta. Diz Pons:

Con este estreno hacemos realidad una de las intenciones iniciales de nuestro concurso de ideas, que era demostrar que, a pesar de lo que se nos critica y se nos acusa, en esta casa hay talento

Ah, claro. Esti programa ye cosa de talentu, nun hai dulda. Pero nun sé si Pons se enterará de que naide critica a TVE porque nun haiga talentu. Critíquenla porque el talentu somórguiase en mierda. Hai talentu, pero xente como él afuégalu y tíralu a la basura, y echa a los que valen y trai a los zoquetes.

Pa rematalo, diz el direutor de deportes de TVE (que pal casu yo diría que ye al tiempu el direutor d'informativos, de programación y financieru):

Estamos muy felices de que el primer proyecto salido del concurso de ideas sea de carácter deportivo, porque destaca la importancia que tiene el deporte, que ha tenido siempre y que va a seguir teniendo.

Cómo non, ho. Hai que tar percontentos, porque si llega a ocurrísenos dalgún programa que nun fora de deportes... a ver qué facíamos. Igual la xente camentaba que el deporte nun yera importante en TVE.

Ana Romero diz:

La idea surge de la posibilidad de unir el deporte con la historia. Es una muestra de nuestros mejores deportes y de jornadas que han estado cargadas de tensión e intensidad y que queremos volver a vivir con sus protagonistas.

Xuntar el deporte ya la hestoria. Suéname a cuandu dicen que tal partíu (de cutio, de fútbol) ye "el partíu del sieglu".

O sea, que nesi concursu d'idegues a lo más que llegaron los empleaos talentosos de TVE foi a decir: "Vamos ver otra vez cómo ganó los tours Indurain, y cuandu España-y metió 12-1 a Malta, y cuandu Arancha ganó los sos torneos, y tó eso. Que ye hestoria, coño, y hai que alcordase de lo buenos que somos". Ah, y que nun falte: la xente va votar los momentos meyores del deporte español, por teléfonu y tó eso.

Menos mal que hebo concursu d'idegues, ho. Si non, cómo díbemos ver to esi talentu y toa esa orixinalidá funcionando. Pero non sé por qué, nun me creo que eso fora lo único que ufiertaron los trabayaores; créome que ye lo único que supieron ver los xefes.

Mentantu, Baltasar Magro sigue faciendo un modestu programa d'entrevistes, De cerca, que ye de lo poco que delles veces, cuandu lo veo ensin querer, nun me dexa camudar el canal. Hai que ver. Ensin concursu d'idegues, ensin recordá-y a la xente lo importante que ye el deporte (velo, non facelo). Hai que eliminar estes rémores de la televisión pública.