El futuru del home (III)

Nun sé si los androides suañen con oveyes eléctriques, pero toi cuasi seguru de que les oveyes sí suañen con androides eléctricos. Y les rates, como Borges, suañen con laberintos.

La ficción y el home son inseparables. Que se sepa, el home ye el único animal que fantasea, que proyeuta, que fai esi exerciciu (que paez delles veces tan poco racional) de representar la realidá con símbolos. Dende que cuantayá entretenía les nueches contando hestories (y asina entamó la lliteratura), o camentaba que los sos muertos teníen una vida dempués de morrer (y asina entamó la relixón), o pensaba nes coses que tenía y nun tenía y nel maxín eses coses teníen el so sitiu enantes y dempués de ganales y perdeles (y asina entamó la contabilidá y, con ella, la escritura), o remembrando les sos caceríes y el peligru fizo dibuxos nes muries de les sos cueves (y entamó la pintura, amás de un pocoñín más de relixón). Esta rellación ente oxetos ya idegues y otros oxetos ya idegues que representen ye ún de los misterios más grandes de la mente humana y de la propia realidá. Los animales nun faen estes tonteríes; nun nos lo paez, polo menos.

Güey llámame la atención cómo la xente va somorguiándose na ficción. Los amigos ya nun son tanto xente a la que ún toca (delles veces col puñu cerrau y nel focicu) y te ayuda a despelleyate les rodiyes; son xente que tal del otru lláu'l messenger, y munches vegáes nun sabemos quién ye el que mos fala (y podemos pensar que ye una mociquina de diecisiete cuandu ye un paisanu de cincuenta y dos). Si nos xuntamos con ellos, nun ye pa xugar al tenis (que de por sí ya ye ficción); ye pa xugar cola wii, que ye un aparatu que val pa xugar a xugar al tenis. Los xuegos de ordenaor y consola son mundos enteros, campañes guerreres, aventures perllargues nes que ún se mete, y ponse un nombre falsu y créese que ye un pirata o un soldáu. Y nun falemos de los xuegos de rol. Ni de World of Warcraft, ni de Second Life. Ni de los programas del corazón, que tan perdayures nes televisiones, y básense en coses falses y montaxes y espolinos de mentira, y la xente que los ve sábelo, pero da-yos igual.

Ye difícil caltriar nestos fenómenos pa saber hasta ónde van aportar. Y paezme otru puntu importante de lo que ta pasando nos caberos años na sociedá: tenemos a los adultos xugando, emplegando milenta hores en vivir una vida de fantasía.

Nun sé si ye nuevo; la verdá ye que la misma novela ya yera un pasu nesta dirección, y los llibros de caballería, y los culebrones, y el cine. Los xuegos de rol, al final, nun dexen de ser obres lliteraries de ficción como les noveles. Siempres hebo xente enganchá a estes coses y que viven más estes mentires que la realidá (agora con WoW, enantes con Madame Bovary). Pero cuandu la teunoloxía permite a ún vivir estes esperiencies en primera persona, y ca vez con mayor realismu, ye como pa preocupase; enantes nun hebía tanta xente leendo Madame Bovary comu agora la hai xugando a Second Life o faciendo'l fatu con MySpace. Y el fenómenu pémeque tien muncha más importancia de la que se-y da.