El futuru del home (II)

Cuando un arqueólogu escargata ente les ruines d'una civilización, atopa coses que lu axuden a reconstruyir lo que yera. Atopa tablilles de barru con lletres cuneiformes, o estatues, o llábanes.

Anguañu hai cantidáes tremendes d'información. Pero ca vez más, ta en discos duros, en caxigalines eléctriques ya óptiques que nun duren muncho. Nun son materiales. Abenayá facíense semeyes, y pa veles hebía que revelales, anque yera caro; namás se facíen nes ocasiones señeres. Lluéu la xente entamó a tener más perres y facer más semeyes, anque fora pol gustu de faceles. Anguañu tol mundu tien máquina dixital, y fai milenta semeyes, y lleva fotoblogs. Y ca vez revelamos menos.

¿Qué va pasar con toa esta memoria? Si un arqueólogu entama a escarbar nos restos de la nuesa civilización dientro 5.000 años, va atopar coses, de xuru, pero... ¿va atopar lo que escribimos? El pergamín dura menos que les piedres, y el papel menos tovía. ¿Cuánto va durar la información escrita nun disquete? ¿O nun servidor? ¿Hai dalguna posibilidá de que estes pallabres que escribo lleguen a ver cinco milenios, como lo que escribíen los monxes sumerios? ¿Será posible que lo único que quede de nosotros seyen les coses escrites en plásticu, como les bolses del súper o los cartelos de Kentucky Fried Chicken?

¿Nun ta too, ca vez más, escrito nel aire? ¿Nun será otra ilusión toa esta memoria enorme que crez de manera descomanáa, pero que en realidá nun ye nada? ¿Ye posible que esta maraviya que ye Internet, de xuru lo más importante que fizo l'home nel sieglu XX, nun seya más que un suañu pasaxeru y desapaeza un día? ¿Que el arqueólogu del futuru nun tenga disquetera na que lleer la nuesa hestoria, mentantu Naram-Sin siga desplicándo-y, con una probe llábana de piedra, cómo se fizo dios más de 2.200 años enantes de Cristu ensin saber siquiera lo que yera'l fierru?