Pasando'l agua

Abenayá lleía un cuentu qu'hebía per casa de La Familia Fariñones, y na típica escena cabera, cuandu'l personaxe va detrás de otru pa pegá-y o cosa semeya, la güela siempres taba detrás diciendo: "¡Hai que pasá-y el agua!" De aquella nun pescanciaba lo que yera (dempués ya lo supe).

Nun tien nada que ver con esta mena de "pasar el agua", pero estos días, en Andalucía, hai escenes tremendes de xente llorando, xente mirando pa'l cielu, procesiones dando vuelta pa la ilesia, y esmolecimientu xeneral pola lluvia. Les procesiones eses son lo más importante pa delles persones, pero si llueve, nun pueden salir.

Y yo entrúgome: ¿Por qué non?

Eses procesiones, nel so paraxismu, son una demostranza de dolor, un actu d'almiración pa con Cristo y el so sacrificiu. Los cofrades lleven pesos descomanáos, van descalzos, castíguense de milenta maneres. Nun pue echalos p'atrás l'agua. Pémeque diba ser un ingrediente más de sufrimientu y d'austeridá.

¿Que los traxes empapáos nun diben llucir igual? Eso tien solución: en poniendo capirotes de GoreTex, o texíos hidrófugos, arregláo.

¿Que nun se pue moyar la imaxinería, porque se estropia? Bueno, camiento que ye importante sacar la imaxen tradicional, pero digo yo que será más importante salir, anque seya con otra imaxen. Pues como les ruedes de les carreres de motos: pue tenese una imaxen pa seco y otra pa moyáo. ¿Que llueve? Sacamos la imaxen pa moyáo, que ye de resina sintética pintada con aerógrafo y de xuru que nun diba haber quien fora pa estremala de la auténtica. Llames a los que faen los muñecos del guiñol de Canal +, y ta fecho. Ye verdá qu'esi material pesará enforma menos que la maera de verdá, y tamién se trata de que los costaleros sufran lo que tienen que sufrir, pero tamién ye mui fácil iguar un llastre de plombu. Así, toos contentos (los costaleros, polo visto, tamién).

¿Que les veles apáguense si llueve penriba d'elles? Home, digo yo que les veles nun sedrán tan importantes, pero pa coses d'iluminación tamién hai arreglu fijo.

Al final, de xuru que lluz más la procesión con buen tiempu, como les escursiones o los partíos de fúbol. Pero el buen tiempu nunca nun tá aseguráu, y una procesión debaxo los rayos, truenos y centelles, arrecostinando col agua y el aire, tamién diba ser bien guapa, a la so manera. Naide nun diba poder decí-yos nada. "Equí vemos la procesión de la Cofradía del Santu Perdón Perpetuu, que güei hebo salir cola imaxen de moyáo por culpa l'agua". Fáise-y dempués una ofrenda a la imaxen orixinal y ya tá (inclusive s'enriquez la lliturxa).

Digo más: paezme cuasi ofensivo que se tea rindiendo cultu a un personaxe como Jesucristo, y a lo qu'él sufrió por nosotros, y que los costaleros lleven esi pesu y esi esfuerciu, pero que se pare too porque llueve y nun fai guapo.

Total, que o hai dalgún motivu pa que les procesiones nun salgan que yo non conozo, o nun entiendo un ren.