Testu n"asturiano La estrelluca

L'otru día un amigu díxome que'l mi blog paecía-y, digamos, mui "revolucionariu", como mui nacionalista. Abultóme mui, mui raro (nada más lloñe del mi envís), y pregunté-y por qué.

Yera por dos razones. Una, por tar escritu n'asturiano (en parte). Otra, pol aspeutu. Concretamente, la estrelluca esa de cinco puntes de la izquierda paecía-y un símbolu nacionalista, una cosa d'estes roxes, como la que llevaba el Che nel gorru.

Cinca la primera razón, nun pueo facer ná. Nun ye culpa mía que haiga quien rellacione una llingua col nacionalismu. Sólo digo que nun uso l'asturiano por nacionalismu. Va muncho tiempu, enantes de entamar el blog, punxe la mi páxina web n'asturiano (y n'otres llingües), y ya por adelantáo (porque ya sé que muncha xente tracamundia los términos), despliqué ellí por qué nun hai que facer nenguna llectura política de eso. Sí ye interesante entrugase por qué hai esa identificación ente l'asturianu y la política. ¿Quién tien la culpa?

Cinca la segunda razón, el aspeutu del blog nun lu fice yo (salvo lo de les banderuques y delles otres coses), ye una plantilla que fizo un estranxeru. Nun pensara yo que esta plantilla fora empobinar a naide a pensar en ideoloxía dala; yo escoyíla namás pola pinta, polos colores que tien, que de entre toles plantilles que vi el día que lu entamé, gustábenme, y paecíense un pocoñín a los de la mi páxina web. Pero pa evitar malos entendíos, de momentu quité la estrelluca esa, pa que nun haiga dulda nenguna. Por si acasu.

2 comentarios:

Anónimo dijo...

Fai tiempo que nun te digo na n'el tu blog, querío Cer.

Paezme de puta madre cómo expliques les coses ya cómu-is das el tu punto de vista, sin ofender a naide, ya sin que naide puea vese ofendío por los tus comentarios.

Préstame muncho, dígotelo de verdá.

Ca ún pué interpretar los tus comentarios, ya los de cualquiera, como-y dé la gana, pero d'ehí, a identificalos con una ideoloxía, hai un mundu.

Conózcote dende fai nun se cuantos años, ya nun sabría dicite a quién votaste en toos estos años, ni falta que me fai.

Si te presta el Che, o te presta el putu capitalismu americanu, eso ye problema tuyu. Si escribes n'asturianu, porque te sal de los santos coyones, y porque tás n'Asturies, y porque sabes, eso ye asuntu tuyu.

Sí dígote una cosina, querío, apreciau, collaciu Cer.

¿A estes altures vas facer casu, por mui amigo tuyo que sexa el que te lo diz, lo que tiés que facer, y dicir, y lo que non?

Da-y caña al teclau Cer, nun dexes títere con cabeza, acaba co la estulticia ya con la necedá del xéneru humanu, pero eso sí, nun faigas como munchos, y te conviertas nun santón d'esos. Tú, sigue siendo tú, Guti, el de Mieres.

Un abrazu d'un amigo.

Guti dijo...

Gracies, collaciu. Póngome roxu al oyite, pero nes mexelles, porque me da apuru tanto apreciu :-)

Nesti casu, naide nun me dixo "quita la estrella esa", ni ná semeyo. Namás me ficieron una descripción de lo que veíen, sin ánimu de decir que tuviera ni bien ni mal. El cambéu fícelu yo porque lo que veíen paecióme raro, que nun diba colo que yo quería decir.