Les notes

Ayeri diome por facer un test d'esos qu'hai abondo pela Internet. Ye un test pa date puntos pola to vida (non de sutura, anque de xuru que delles vegáes faen más falta).

No que más puntos me da ye coles perres y col mi cuerpu. Ye ablucante, porque les perres que gano nun m'abultan bastante pa tener un 9,3 sobre 10; vivo d'un sueldu bien corriente. Además, la verdá ye que'l test nun fai nenguna entruga pa saber númberos; nun pregunta cuánto ganes, cuántos coches tienes nin coses así. (Nun tengo coche propiu).

Del cuerpu, pa qué vamos falar. Nunca nun se m'averó naide, ni una sola presona, porque-y gustara el mi cuerpu (por contra, nun sé a cuántos, o más bien cuántes, habré espantao ensin sabelo, pero camiento que munches). Amás, el test tampoco facía entrugues mui detalláes.

Pémeque'l test basábase más que ná na percepción que caún tien de la so situación. La manera de sacar un 10 nun ye tener un cuerpu 10; ye que si t'entruguen si tas contentu con él, sientas que sí, y que si te pregunten si tienes enfermedáes, sientas que non (si pués, claro). Tol mundu tien achaques, y yo'l primeru, pero pémeque tengo muncha suerte colo que tengo.

Pol contrariu, sálenme notes buenes, pero más baxes, notres estayes que yo nun diría que son peores que'l mi cuerpu o les mis perres. Y salme una nota baxa n'amigos y familia, nun sé por qué.

Coime, nun ye namás qu'un test d'Internet. Nun se pué tomar mui en serio. Pero ye verdá que ser un trunfador nun ye facer lo que nos anuncios mos dicen que fagamos. Ye sentise trunfador. Tener muncho ye cosa namás de date cuenta de que ye verdá que tienes muncho. Si non, ya pues ser dueñu'l mundu, que vas querer más. Los ricos son los que más s'esfuercien por pisar a más xente y ganar entovía más perres, siendo los que más tienen; los más cachas y fuertes son los que se ponen a tomar esteroides pa tar entovía más fuertes.

This Is My Life, Rated
Life:	7.8
Mind:	8
Body:	9.6
Spirit:	7
Friends/Family:	4.5
Love:	7.3
Finance:	9.3
Take the Rate My Life Quiz