La xuez de Otegi

Tan xulgando a Otegi por enaltecer el terrorismu.

Y Otegi ye impresentable abondo, pero lo más impresentable de la sala ye esa xuez.

Paezme que nun se pue tolerar esa mena de falar, chulesca, graciosina, improcedente. Paezme que ye una falta de respetu contra el acusáu, los abogáos, el públicu, los ciudadanos que-y encargan una xera tan seria, y contra la xusticia misma. Un xuez tien que ser seriu, téunicu, neutral y garantista, igual que un periodista tien que ser discretu y non protagonista. Los comentarios tan de más.

Esta señora ta mui al tantu pa decir fatiáes, pero pal so trabayu non anda igual de llista. resulta que tan xulgando a Otegi por enaltecimientu del terrorismu nun actu nel que participó, y... nun saben lo que dixo Otegi, porque díxolo n'euskera. Y resulta que tan traduciéndolo agora. Lleven dos días de retrasu por culpa d'eso.

Pero ¿qué coño de instrucción se fizo equí? ¿Qué base hebo pa detener y xulgar a Otegi? Igual la participación nel actu ye bastante, nun digo que no, pero ¿non hebo tiempo pa facer una puñetera traducción d'un discursu?

A mí, como ciudadanu, que me siento representáu por esa xuez, dame vergüenza.