De resurrecciones

Güey foi a echar un güeyu a la columna (vamos llamala blog) de Javier Ortiz, como tolos días dende fai años. Nun m'alcuerdo cómo atopé a Ortiz, pero dende'l principiu interesóme'l so puntu de vista. Non porque fora el míu; ye que dafechu nun lo yera (en delles coses; en otres, sí). Participé n'aquel foru, "la patera", que abrieron los sos llectores cuando entamaba too esto de los blogs y los foros (y que se abrió el día del mi cumpleaños, casualmente). Y ellí cambié de opinión muncho, en munches coses.

Ortiz escribe tolos días, algunos dos veces, y sólo se retrasa cuandu hay dalgún problema informáticu o causes de fuerza mayor (cuando morrió la má, por exemplu).

Últimamente dixera que taba malu. Y les columnes que salíen paecíen de eses "de nevera", que los buenos escritores tienen preparaes en reserva por si nun puen escribir sobre la actualidá.

Güey vi que nun s'actualizaba el so blog. Cosa rara, porque naide escribe, como digo, de manera tan regular. Y ya pensé mal. Y póngome a echar un vistazu a la portada de El Mundo y dicen que morrió.

Nun sé mui bien qué escribir. Yo ya sabía que fai muncho dexó escrita la so necrolóxica, así que de xuru que va ser la que saquen güey, si conocíen a Ortiz. Y en homenaxe a un bon escritor y a una persona racionalista (contradictoria a veces, como tol mundu), nun voi facer más que escribir otra cosa que, anque paeza que non, vien a cuentu, porque yera un amante de la llingua castellana, y pruyía-y escribir correutamente y que se escribiera correutamente (basta ver la so cabera columna).

Y lo que diba escribir yo ye, cómo no, sobre un titular de portada de El Mundo: "Descienden progresivamente las muertes en México".



El artículu enllazáu pon otru titular, pero semeyu:



Si el periodista que escribió eso sabe cómo facer que baxe el númberu de muertos, por favor, que me lo desplique. Tengo delles persones que traer de vuelta.

Vamos echate de menos, Javier.