Maribel Moreno

"Dígoy-lo mirándo-y a los güeyos, señor como se llame. Váigase a tomar por culo."

Eso ye lo que podía decí-y Maribel Moreno a toa la xente que agora lleva les manes a la tiesta y pon el gritu nel cielu pol so positivu d'EPO.

Nun sé cuántos kilómetros fadría Maribel Moreno encima la bicicleta pa dir a los xuegos. Pero por ca ún que tenga fecho ella, de xuru que hai milenta más que ficieron otres ciclistes como ella. Otres que amen la bicicleta, que nagüen por esi deporte, por ver carretera delantre, y ser meyores ca día, y dir de un llau pa otru a competir.

A toes eses muyeres nun les conoz ni Dios. Lissavetzky nun se fai fotos con elles, ni diz que tea arguyosu como ta con Nadal.

La vida d'un deportista con pasión por un deporte tien que ser dura. Munches, munches, munches hores de sudu ensin que naide te vea nin te aplauda. Y la diferencia entre una dependienta cualquiera de Zara que poles tardes escapa a rodar o facer peses y esta Maribel Moreno que agora tachan toos de tramposa ye unos resultaos: unes décimes o unos minutos en ca carrera. Unos metros dempués de facer setenta kilómetros. Pongamos que diez sobre setentamil. El cero coma cero ún por cientu. Y eso falando de la carrera, porque nel entrenamientu y el esfuerciu la diferencia pue ser menor, o incluso a favor de la que perdió.

Esos metros deciden quién recibe beques, o va a los xuegos olímpicos. Y quién tien el honor de facese la foto con Lissavetzky, claro. Pero eses beques, esi puestu nel equipu olímpicu, toa esa diferencia entre el que sube a un caxón a recoyer una medalla y el que lo mira pola tele frayáu dempués de dir a trabayar como tolos días y lluéu a entrenar pa nada, y que nun tuvo sitiu nel equipu olímpicu... ¿Ye esa la diferencia que hai entre eses dos persones? ¿Entre esos dos deportistas?

¿Sí?

Pues entós lo más intelixente que pue facer una muyer ciclista ye dopase, y a ver si hai suerte.

A esta moza nun la sintiera nomar enxamás. A naide-y importa una mierda lo que fai el restu'l añu (como naide s'alcuerda d'una velocista española que ganó ¡once! medalles d'oru en seis xuegos olímpicos, pero sí s'alcuerden de Raúl hasta cuando ta de vacaciones). Siéntola nomar agora porque dio positivo. Y pónense toos dignos, como si tuvieran al marxen de lo que pasa. Como si nun vivieran d'esti circu. D'esta farsa que ye el deporte d'alta competición. Como si el deporte d'alta competición fora bueno pa la salú. Como si eses neñes de catorce años que faen ximnasia tuvieran faciendo dalgo bueno pa elles. Como si yos importara lo que va pasar con elles cuando tengan dieciocho y seyan... vieyes.

Siéntolo abondo por Maribel. Nun me gusten les trampes, nin tengo a los tramposos por llistos. Pero los xuegos olímpicos ya apesten de principiu a fin, son una trampa de principiu a fin. Estos mandamases creen que se llimpien les manes al renegar de la ciclista tramposa, que cuanto más la insulten a ella más altu ye el pedestal d'ellos pa tar por enrriba de la mierda; comu cuando na edá media denunciabes a un xudíu o a un herexe o a una bruxa. Pero d'esa mierda, anque nun la vean, tan rodiáos.

Tienen dalgo de xenerales que manden a otros a la guerra, y entós indígnense cuandu pesquen a un desertor. Pero yo véolo d'otra manera.

Hai que pensalo dos veces enantes de nun simpatizar colos desertores. Suelen ser meyor xente que los soldáos.

Y si dalgo fai grande a un deportista, ye'l esfuerciu, la superación, la constancia. Si yo me forro a EPO, nun llego a unos xuegos, nin siquiera a ganar una carrera nes fiestes patronales del pueblu. Si Maribel se dopó, fue pa llegar enantes nesos diez metros que lo deciden too; pero tol restu del percorríu fízolu, una pedalada detrás d'otra.

Pero pa mí esos diez metros nun importen tanto. Dende lluéu, non tanto como les milenta hores, los milenta kilómetros que fizo enriba la bici.

Tuvo una flaqueza, cometió un erru, pescáronla nun renunciu. Pero si tengo que tar arguyosu d'un deportista que sube al caxón a por una medalla, casi tolo que me puea facer tar arguyosu d'é, tamién lo fizo Maribel. Digo más: tuvo dispuesta a dexar la so salú por España. ¿Nun ye eso lo que quieren los xenerales?