Disculpes

Iñaki Gabilondo discúlpase (na segunda metá del vídeu) por una noticia na que decíen que un asistente a una manifestación de la AVT que diba en silla ruedes taba faciéndose pasar por víctima del terrorismu ensin selo. Nun me da más si Gabilondo tenía que pedir perdón o non, nin si lo que facía esi individuu taba bien o mal, nin si Cuatro, y la SER, y Polanco, y les fuercies del mal y la flauta de Bartolo. Namás quiero apuntar que güey oyí a un periodista pedir disculpes (y non deletreando pallabres) con toes les de la llei por daqué que fizo mal. Apúntolo nel blog porque nun pasa munches veces. Y da gustu oyilo, y éntren-y a ún ganes de respetar a Gabilondo un pocoñín.